Երեկվանից Ծիծեռնակաբերդում ոգեկոչման արարողակարգ է ընթանում, սակայն առանց մեզ: Այս տարի, ցավալիորեն, մենք անձնապես չենք կարող ներկա լինել բարձունքում, սակայն բոլորի մտքերն ու հայացքներն ուղղված են այնտեղ:
Ժամը իննից հայերը մի որոշ ժամանակով անջատել էին իրենց տների լույսերը: Հեռախոսային լույսերով բոլորն իրենց հայացքներն ու մտքերը սևեռել էին իրենց համար սրբազան համարվող բարձունքն ու մտովի վերապրում էին իրենց պապերի կորստի ցավը:
Կառավարության կազմակերպած միջոցառումների շրջանակում երեկոյից Ծիծեռնակաբերդում կենդանի երաժշտությամբ հնչում էին տարբեր ոգեղեն երգեր, որոնք գրվել են հենց օրվա խորհրդի առիթով:
Անասելի հուզիչ ու փշաքաղվելու չափ ազդեցիկ տեսարաններ են ստացվել արդյունքում, որոնք էլ տարածվել են համացանցով մեկ: Լուսանկարներում լուսային ապշեցուցիչ խաղարկումներով հրաշալի կերպով արտացոլված են հուշահամալիրի խորհրդավորությունն ու տխրությունը:
Առավոտվանից ևս շարունակվում են դեռ երեկվանից սկսված արարողակարգի ծիսակատարությունները: Այստեղ են այցելել վարչապետը, նախագահը, Արցախի նորընտիր նախագահը, ԱԺ նախագահը, կաթողիկոսը և այլք: