Քաղաքապետը այսօր այցելել է 16-րդ թաղամաս՝ հյուրընկալելով Դավիթ Օսիպյանին։ Դավիթն արցախյան վերջին պատերազմի այն մասնակիցներից է, ով կորցրել է քայլելու կարողությունը։
Հետպատերազմյան շրջանում քաղաքապետարանը նոր վերելակներ տեղադրելու հարցում առաջնահերթությունը տվել է այն շենքերին, որտեղ արցախյան մարտերի մասնակիցներ են ապրում։
Այդպիսով քաղաքապետարանը նպատակ է ունեցել թեթևացնել հայրենիքի համար առողջությունը զոհած մարդկանց կյանքն ու կենցաղը։
Հայկ Մարությանն անձամբ ցանկացել է հասկանալ, թե որքանով են նոր վերելակները ազդում հաշմված քաղաքացիների կենցաղը թեթևացնելու հարցի վրա։ Նա զրուցել է Դավիթի հետ, ծանոթացել երիտասարդ տղայի ապագա ծրագրերին։
Պարզվում է՝ Դավիթը մինչ ծառայության անցնելը նպատակադրվել է խոհարարական գործով զբաղվել, սակայն այժմ ցանկանում է ընդունվել Ֆիզկուլտ ինստիտուտ և դառնալ բժիշկ-կինեզիոլոգ, քանի որ սեփական փորձով համոզվել է, թե մեր օրերում որքան կարևոր է այդ մասնագետի դերը։
Հայկ Մարությանի այցի մասին պատմող տեսանյութը կարող եք դիտել ստորև կցված նյութի մեջ։
