Հայտնի ու տաղանդաշատ երաժիշտներից Հայկոն երեկվանից բուժում է ստանում Միքայելյանի անվան հիվանդանոցային կենտրոնում։ Երգչի առողջական վիճակի մեջ ոչ միայն դրական տեղաշարժ չկա, այլ նաև ավելի վատ դինամիկա է նկատվում։
Բանն այն է, որ երգիչը ութ օր շարունակ բուժվել է տան պայմաններում՝ խուսափելով դիմել բժիշկների օգնությանը։ Բժիշկները նրա վիճակի բարդության մասին տեղեկացել են միայն այն ժամանակ, երբ վիճակն այնքան է ծանրացել, որ հարազատները փորձել են շնչառական սարք ձեռք բերել նրա համար։
Հայտնի բժիշկներից Արմեն Մուրադյանն անձամբ է համոզել, որ երգչին անմիջապես հիվանդանոց փոխադրեն։ Այդ ժամանակ ախտահարված է եղել Հայկոյի թոքերի շուրջ ութսուն տոկոսը, ինչը թույլ չի տվել երգչին շնչել առանց սարքավորումների օգնության։
Այսօր երգչին միացված է արհեստական շնչառական սարք, որի միջոցով նա կարողանում է շնչել, բայց վիճակը շարունակում է ծանրանալ։ Երգչի ընկերները խիստ անհանգիստ են նրա կյանքի համար։
