Սարգիս Դադոյանը Ջրականի ժամկետային զինծառայողներից էր, ով 2019 թվականի ամռանից էր իրականացնում իր զինծառայությունը։
Սարգիսը պատերազմական գործընթացներին մասնակցել է սկզբից մինչև նոյեմբերի ինը, իսկ այդ օրից ի վեր ծնողները որդուց որևիցե զանգ այլևս չեն ստացել։
Մայրը՝ Կարինեն, հիշում է, որ Սարգիսը տարիներ առաջ մի մարգարեական երազ է տեսել ու պատմել իրեն։ Երազում Սարգիսը տեսել է, որ ինքը զոհվել է պատերազմի ժամանակ, իսկ ծնողները նոր որդի են ունեցել։
Երբ ծնողները լսել են իրենց որդու զոհվելու լուրը, հիշել են նրա երազը։ Օրեր առաջ լույս աշխարհ է եկել Սարգսի կրտսեր եղբայրը՝ Դանիելը։
Մայրը ասում է, որ նորածին բալիկն իր հետ նաև ժպիտ ու մխիթարանք է բերել իրենց։
Տիկին Կարինեն ցանկանում է, որ բոլոր այն ընտանիքները, որոնք ցավալիորեն արժանացել են իրենց բաժին հասած ճակատագրին, անպայման նոր համալրում ունենան, քանի որ դա մխիթարության միակ եղանակն է։
