Լեգենդար արտիստուհիներից Գալյա Նովենցն այսօր կդառնար ութսունհինգ տարեկան։ Գալյան ծնունդով Երևանից է․ հենց այստեղ էլ արտիստական կրթություն է ստացել՝ հետագայում հանդես գալով Կապանի, Գյումրու, ապա՝ Երևանի թատրոններում։
Գալյան մասնագիտության բերումով հանդիպում է ռեժիսոր Երվանդ Ղազանչյանին, որի հետ էլ ընտանիք է կազմում՝ լույս աշխարհ բերելով երկու զավակների։ Գալյայի և Երվանդի զավակներից մեկը, որ հաստատվել էր Ամերիկայում, վաղ է հեռանում կյանքից։
Նրանց մյուս զավակը ապագա տաղանդավոր ռեժիսոր Հակոբ Ղազանչյան է, որն այսօր իր կնոջ և դստեր հետ փորձում է շարունակել ծնողների ավանդը։ Այս ընտանիքն իր կենսագործունեությամբ շատ արժեքավոր բան է տվել ու տալիս հայ մշակույթին։
Դեռ երիտասարդության տարիներից իր տաղանդով աչքի ընկնող Գալյան շուտով դառնում է բոլոր ռեժիսորների ամենից նախընտրելի արտիստուհին, որի հետ համագործակցել ցանկանում էին շատերը։
Արտիստուհին մինչև կյանքի վերջին տարիներն էլ՝ օր ծերության ապրում էր թատրոնով, թատրոնի համար։
