Բազմաթիվ չեմպիոնական տիտղոսներ նվաճած, լեգենդ դարձած Շավարշ Կարապետյանն այսօր տոնում է ծննդյան յոթանասուն ամյակը:
Սպորտային ասպարեզում բազմաթիվ ու բազմապիսի մրցանակներ շահած և մեծ ձեռքբերումներ ունեցած մարզիկն իր կյանքի լավագույն մրցանակն ու ձեռքբերումը համարում է այն բոլոր անձանց կյանքը, որ հնարավորություն ունեցավ տարիներ առաջ փրկել:
Դեպքերը հայտնի են ավագ սերնդի շատ ներկայացուցիչներին: Իսկ կրտսեր սերունդը դրանց մասին իմանում է դասագրքում տեղ գտած գեղեցիկ պատմությունների միջոցով:
Խոսքը 1976 թվականին Երևանյան լիճ ընկած տրոլեյբուսի մասին է, որտեղ պատահաբար հայտնված լողորդը փրկում է շատերին խեղդվելուց:
Բայց դրանից առաջ Շավարը դարձյալ աչքի էր ընկել փրկարարական իր բացառիկ կարողություններով: Երևանյան լճի դեպքից դեռ երկու տարի առաջ նա դիպվածով հայտնվել էր այնտեղ, որտեղ պետք էր:
Ավտոբուսը, որտեղ երեսունից ավել ուղևոր կար, որոշ անսարքություններ ունեցավ ճանապարհին: Մինչ վարորդը փորձում էր դրսում հասկանալ անսարքության պատճառը, մեքենան սկսել է շարժվել:
Արագ կողմնորոշվելու շնորհիվ Շավարշը կարողացել է կոտրել վարորդի խցիկի ապակին ու ընթացքի ուղղությունը փոխելով՝ փրկել ավտոբուսը վթարից:
