Հայկոյի ընկերները արդեն մեկ տարի ու դեռ երկար փորձել ու փորձելու են ու չեն կարողանալու հաղթահարել իրենց սիրելի ընկերոջ բացակայությունը։ Հայկոյի մահվան մեկամյա տարելիցը առիթ է դարձել, որ շատերն իրենց սրտի խոսքն ու կարոտն արտահայտեն սիրելի երաժշտին։
«Հայկո Հակոբյան Հիմնադրամ»-ը Հայկոյի մահվան օրը ներկայացրել է «Դու գնացիր վերև» գեղեցիկ ստեղծագործությունը, որը կատարում են Հայկոյին շատ սիրող նրա ընկերները։ Երգի խոսքերը հեղինակել է Գևորգ Ալթունյանը, իսկ երաժշտության հեղինակն է Րաֆֆի Ալթունյանը։
Ստեղծագործության գործիքավորմամբ զբաղվել է Էմանուել Հակոբյանը, կիթառը հնչեցնում է Վարդան Եգորյանը, իսկ տեսահոլովակը, որը ներկայացվում է ստեղծագործության մատուցմանը կից, հեղինակել է Հայկոյի լավագույն ընկերներից մեկը՝ Հրաչ Քեշիշյանը։
Երգն, ըստ երևույթին, ստեղծվել է Հայկոյի վերջին գեղեցիկ գործերից մեկի տրամադրություններով։ Հայկոյի մահվան մեկամյա տարելիցի առիթով նրա մտերիմ ընկերների ներկայացրած գեղեցիկ ու հուզիչ գործը կարող եք ունկնդրել ստորև կցված նյութի մեջ։
