Ռաջնի Ավագյանը գրել է․ «Սիրելի ընկերներ, խորին ցավով տեղեկացնում ենք, որ այսօր իր մահկանացուն կնքեց «գույնի ու գծի վարպետ» անվանի գեղանկարիչ, հայր, եղբայր և ընկեր Էդվարդ Սասունը (Ավագյան)։ Կորցրեցինք տաղանդավոր արվեստագետի։ Թող նա խաղաղությամբ ննջի, իսկ հիշատակը հավերժ ապրի մեր հուշերում և իր թողած հարուստ ժառանգությամբ։
Հոգեհանգստի արարողությունը տեղի կունենա Մալաթիայի Սուրբ Աստվածածին եկեղեցում (Հասցե՝ 34 Սեբաստիա փողոց), մարտի 19-ին, ժամը 17.30։ Հողարկավորության արարողությունը տեղի կունենա հաջորդ օրը, ժամը 13-ին, իր ծննդավայրում՝ Թալին համայնքի Շղարշիկ գյուղում ։ Բոլոր ցանկացողները կարող են միանալ հրաժեշտի արարողությանը։
Էդվարդ Ավագյանը ծնվել է 1955թ․ հունվարի 24-ին, Թալինի շրջանի Շղարշիկ գյուղում սասունցիների ընտանիքում։ Ավարտել է Երևանի Պետական համալսարանի տնտեսագիտական կիբեռնետիկայի և արվեստագիտության բաժինները: Ստեղծագործել է վաղ տարիքից։
Արվեստի նկատմամբ մեծ սերը նրան տարավ Լենինգրադ` Ռեպինի անվան Գեղարվեստի ակադեմիա, որտեղ ավարտեց Գեղանկարչության բաժինը։ Նրա աշխատանքները բազմիցս ցուցադրվել են աշխարհի տարբեր երկրներում, շուրջ 550 կտավ գտնվում է մի շարք երկրների մասնավոր հավաքածուներում։ Նրա աշխատանքները հրատարակվել են տարբեր կատալոգներում»։