Հանրահայտ դրամատուրգ, հաղորդավարական հաջող փորձ ունեցող Կարինե Խոդիկյանի ծննդյան օրն է։ Նա ծնունդով Ախալքալաքից է։ Երևանում բանասիրական ֆակուլտետն ավարտելուց հետո վերադարձել է հայրենի Ախալքալաք՝ աշխատելով հայոց լեզվի ու գրականության ուսուցչուհի։
Մանկավարժական հինգամյա գործունեությունից հետո սկսել է թղթակցել թերթերի ու ամսագրերի։ 1989 թվականից հայտնի «Գարուն» ամսագրի խմբագիրն է։ Կ․ Խոդիկյանը 2000 թվականից տարբեր պատասխանատու պաշտոններ է զբաղեցրել մշակույթի նախարարությունում։
2008 թվականին նա իր դիմումով վերջնականապես դուրս է եկել Մշակույթի նախարարի տեղակալի պաշտոնից։ Կ․ Խոդիկյանը ստեղծագործում է։ Նրա պիեսների հիման վրա Հայաստանում և արտերկրում բեմադրվում են արդիական թեմաներ բարձրաձայնող ներկայացումներ, որոնք սիրով են ընդունվում։
Կ․ Խոդիկյանը գրել սկսել է յոթերորդ դասարանից։ Գրել է առաջին սիրո մասին, սակայն հասցեատերն այդպես էլ այդ մասին չի իմացել։ Կ․ Խոդիկյանն ամուսնացած է։
Նա խոստովանում է, որ իր բոլոր հաջողություններն ամուսնու աջակցությամբ են գրանցվել։ Դրամատուրգն առիթների ժամանակ կարոտով է խոսում հայրենի Ախալքալաքի մասին, որտեղ ապրում են նրա հարազատները։
