Երջանկահիշատակ արտիստուհի Ժենյա Մկրտումյանն այսօր կդառնար յոթանասունչորս տարեկան։ Նա կյանքից հեռացել է վաթսունութ տարեկան հասակում։ Դերասանուհին շատ ակտիվ ու կենսունակ էր, ուստի նրա մահը շատ անսպասելի էր շատերի համար և ցավով ու ափսոսանքով ընդունվեց։
Ժենյան մեծացել է արտսիտական միջավայրում։ Նրա տատիկը լեգենդար արտիստուհի Արուս Ոսկանյանն է եղել։ Ժենյայի դուստրը ևս հեռու չէ մշակույթից։ Նա երգչուհի Մայա Մարգարյանն է, որը ներկայանում է ինքնատիպ կերպարով։
Ժենյայի մասին նրա գործընկերներն ու ընկերները շատ ջերմ հիշողություններ ունեն։ Լիանա Անթառանյանը պատմում է հետևյալը․ «Մի դեպք պատմեմ ու ինքներդ էլ, գիտեմ, կապշեք պատմությանս առանցքի շուրջ։
Այն արվեստագետի մեծ նվիրումի, սիրո և պատասխանատվության ու հավատարմության մեծ զգացումների մասին է, ամառային մեր հերթական հյուրախաղային տուրը պիտի մեկնարկվեր դեպի զորամասեր։
Գագիկ Ծառուկյանի հովանավորությամբ և ՊՆ-ի աջակցությամբ, պիտի գնայինք հեռավոր Սյունիք, այնտեղից էլ, պիտի գայինք, հասնեյինք մինչև Բերդ, զանգ եկավ, վերցրի, Ժենյաս էր։ Նա հուզմունքը կոկորդում հազիվ խեղտած, ինձ հայտնեց, որ Մոսկվայում մահացել է իր միակ քույրը։
Ես սառած մնացի՝ ինչպես, ոնց, ախր տղաները մեզ սպասում են, հովանավորի առաջ պատասխանատվության մեծ զգացում։
— Լիանչկա, բայց դու մի նեղվիր, ես քեզ, տրուպային և զինվորներին հուսախաբ չեմ անի, ես խնդրել եմ մերոնց, որ դիակը պահեն սառնարանում, մինչև, որ կավարտեմ հյուրախաղերը»։