«Մշակութային Սյունիք» լրատվական պորտալը հայտնում է, որ այսօր Կապանի դրամատիկական թատրոնի կողային հատվածում տոնական կերպով բացվել է ՀՀ ժողովրդական արտիստներ, Կապանի պատվավոր քաղաքացի Երվանդ Ղազանչյանի և Գալյա Նովենցի միասնական հուշատախտակը։
Դիմաքանդակի բացման արարողությանը ներկա է եղել Երվանդ Ղազանչյանի և Նովենցի որդին՝ ՀԹԳՄ նախագահ Հակոբ Ղազանչյանը, ինչպես նաև Կապան համայնքի ղեկավարի տեղակալ Գոռ Թադևոսյանը, արվեստի, մշակույթի գործիչներ, թատերասեր կապանցիներ:
Ներկաները արտիստներին արժևորող ելույթներ են ունեցել։ Հիշեցնենք, որ տաղանդավոր մշակութային գործիչներն իրենց ստեղծագործական ուղին սկսել են Կապանի թատրոնից, մեծ ավանդ ունեն թատրոնի զարգացման գործում:
Ե․ Ղազանչյանը եղել է Կապանի թատրոնի ղեկավարը, իսկ Գալյա Նովենցը՝ առաջատար դերասանուհիներից մեկը։ Այսօր թատերական աշխարհը հիշում և նշում է տաղանդաշատ դերասանուհու տարեդարձը. դերասանուհին կդառնար 85 տարեկան:
Հակոբ Ղազանչյանը օրվա ավարտին դերասան ընկերների հետ նշել է այդ կարևոր առիթը՝ Կապանից լուսանկար տեղադրելով։
