Այս օրերին Հունգարիայի մայրաքաղաքում ընթանում են լողի միջազգային մրցույթներ, որոնց մասնակցում են աշխարհի տարբեր ծայրերից մասնակից լողորդներ։ Մրցույթն առանց միջադեպերի չի անցել։ Բոլորին ցնցել է ամերիկացի լողորդի հետ կատարված միջադեպը։
Անիտա Ալվառեսը, որ ներկայացնում էր Ամերիկան, հենց մրցույթի մեկնարկից հետո՝ լողալու ժամանակ անսպասելի կորցրել է գիտակցությունը։ Ներկաներից միայն Իսպանիայի հավաքականի մարզիչն է իսկզբանե նկատել ամերիկացի մարզուհու հետ տեղի ունեցածը։
Նա անմիջապես բղավել է և հորդորել, որ փրկարարները նետվեն ջուրը՝ Անիտային փրկելու, սակայն քանի որ փրկարարները հապաղել են, մարզիչը՝ Անդրեա Ֆուենտեսը, անձամբ է նետվել ջուրը՝ Անիտայի կյանքը փրկելու համար։
Անդրեային հաջողվել է փրկել Անիտայի կյանքը։ Երբ նա հասել է Անիտային ու տեսել, որ լողորդը չի շնչում, շատ է վախեցել ու անհանգստացել, սակայն ջրից դուրս բերելուց հետո Անիտան ուշքի է եկել։ Նրա թոքերում փոքր-ինչ ջուր է հավաքված եղել, սակայն Անիտայի շնչելուց հետո ամեն ինչ կարգավորվել է։
