Այսօր մի ցավալի իրողության մասին տեղեկություն հանրայնացվեց համացանցում: Երեկ Գյումրիում մի քահանայի կին էր մահացել բավականին ցավալի հանգամանքներում:
Պարզվում է՝ կնոջ, ամուսնու, որ քահանա է, ինչպես նաև նրանց տան մյուս անձանց մոտ երկարատև առողջական վատթարացում է գրանցվել, սակայն ոչ մի բուժօգնության դիմելու ցանկություն չեն ունեցել:
Երբ տեղամասային բժիշկն իմացել է դրա մասին, նրանց ուղղորդել է թեստավորման, սակայն նրանք կտրականապես մերժել են այդ առաջարկը:
Բանը հասել է նրան, որ միջամտել է նաև մարզային ինֆեկցիոն հիվանդանոցի տնօրենը, սակայն ընտանիքի անդամները շարունակել են մերժել այդ առաջարկը՝ մեկնաբանելով չիպավորման վախով:
Նրանք նշել են, որ ավելի շուտ գերադասում են տանը մահանալ, քան թեստավորման պատրվակով չիպավորվեն: Միայն բուժաշխատողների պնդումներից հետո է հաջողվել կնոջը հիվանդանոց փոխադրել:
Սակայն այնտեղ էլ է անհնար եղել նրա կյանքը փրկելը: Պատմելով այս մասին՝ տեղամասային պոլիկլինիկայի տնօրեն Հ. Վարձելյանն ասել է, որ ամուսինը փոշմանել է, սակայն արդեն անօգուտ է: