Համավարակը ոչ միայն դժվարությունների, ցավալի լուծումների պատճառ է դառնում, այլև վերաաժևորումների ու կյանքը նորովի ընկալելու առիթ է դառնում: Այս համատեքստում ստեղծվում են նաև մշակութային արժեքավոր գործեր:
Թագավարակային մթնոլորտում ծնվել է մի հուզիչ ու հրաշալի երգ, որը ստեղծվել է հեռավար համագործակցությունների արդյունքում:
Երգի երաժշտության հեղինակը Մարինե Գյուլումյանն է: Այստեղ հնչում է նաև Արտյոմ Մինասյանի դուդուկի հրաշալի ձայնը: Երգի խոսքերը հեղինակել է տաղանդավոր ստեղծագործող Լիլիթ Բլեյանը:
Երգում արտահայտվում է հետաքրքիր գաղափար, մարդկային մտքեր, որոնք այս օրերին արթնանում են շատ-շատերի մոտ: Երկար ձգվող դաժան գարունը, որ մարդկանց միջև տարածություն սահմանեց ու գծեց, արտացոլվել է նաև այս ստեղծագործության մեջ:
Երգն իր չքնաղ կատարմամբ ավելի ազդեցիկ ու հնչեղ է դարձրել Իվետա Մուկուչյանը: Սա սթափության յուրօրինակ կոչ է, նոր գարունների իղձ ու երազանք, նոր բացվող լույսի հավատ:
Տեսահոլովակում տեղ են գտել այժմեական կադրեր, հուզիչ տեսարաններ:
