Լրագրող, վերլուծաբան Կարեն Քոչարյանն անդրադարձել է Ծիծեռնակաբերդում կազմակերպված ոգեկոչման արարողակարգին, դրա անցկացման մակարդակին՝ տեղի ունեցածը բնութագրելով որպես գլուխգործոց:
Իր ամփոփիչ խոսքում նա հիշատակել է բարձունք բարձրացող, արևածաղիկ «չրթող» մասսայի ամենամյա ներկայությունը, անսցենար կազմակերպված միջոցառումները, սափրագլուխ թիկնապահների առկայությունը, բովանդակային նույնությունն ու ցածրաճաշակությունը՝ համադրելով այս տարվա կազմակերպած արարողության հետ:
Լրագրողը նշում է, որ կազմակերպիչներին հաջողվել է գերազնցել բոլոր սպասելիքները՝ ստեղծելով ավելին, քան կարելի էր պատկերացնել: Ընդ որում, նրանք դրա համար ունեցել են ընդամենը վեցօրյա ժամանակահատված:
Փաստելով այս տարվա արարողակարգի առավելությունները՝ լրագրողը նշել է, որ տեղի ունեցածը կարելի է համարել կարանտինային սահմանափակումների դրական կողմը: Նա իր ուրախությունն է հայտնել այն առիթով, որ մենք առիթ ունեցանք այս անգամ աշխարհին ներկայանալ բարձր մակարդակով, անկեղծ ու առանց ավելորդ ցուցամոլության:
Ամփոփելով խոսքը՝ Կ. Քոչարյանն իր երախտիքն է հայտնել կազմակերպիչներին, քանզի նրանց շնորհիվ աշխարհը հնարավորություն է ունեցել շնչել բարձրարժեք մշակույթով:
