Նուրբ հավից ռուլետը՝ սնկային միջուկով հիանալի է տոնական սեղանի համար: Հավի ֆիլեն նախ մարինացվում է յոգուրտում՝ մանանեխով։ Յոգուրտը կփափկեցնի ֆիլեն ու այն ավելի հյութեղ կդարձնի։ Տարիներով ստուգված համադրությունը՝ հավի, շամպինյոնների և պանրի, ոչ մեկին անտարբերի չի թողնի:
Անհրաժեշտ է
Հավի ֆիլե՝ 2 հատ
Շամպինյոն՝ 10 հատ
Սոխ՝ 1 գլուխ
Պանիր՝ 30 գ
Բուսայուղ՝ 2 ճ/գ
Յոգուրտ կամ թթվասեր՝ 1 ճ/գ
Մանանեխ՝ 1 ճ/գ
Մաղադանոս՝ 1 ճ/գ
Սխտոր՝ 1 պճեղ
Աղ և սև պղպեղ՝ ըստ ճաշակի
Պատրաստման եղանակը
Հավի ֆիլեն ծեծել, խառնել յոգուրտը և մանանեխը, քսել հավի ֆիլեի վրա և թողնել՝ մարինացվի: Սոխը և սունկը կտրատել, տապակել բուսայուղի մեջ՝ մինչ պատրաստ լինելը: Մաղադանոսը և սխտորը կտրատել, պանիրը քերել:
Սնկա-սոխային զանգվածին ավելացնել սխտորը, մաղադանոսը, պանիրը, խառնել և հանել կրակից: Ֆիլեն շարել իրար վրա և կենտրոնին դնել միջուկը՝ փաթաթելով ռուլետը:
Այն ամրացնել ատամի չոփերով և դնել ջեռոցի կաղապարի մեջ՝ կարը ներքև: Թխել 180 աստիճանի ներքո՝ 20-30 րոպե: