ՀՀ զինված ուժերի մայոր, Արցախյան մարտերի մասնակից Սարգիս Ստեփանյանը կրկին հերոսացել է։ Նա մասնակցել է Ռումինիայի Կոնստանցա քաղաքում կայացած բազկամարտի համաշխարհային ստուգատեսին և չեմպիոն դարձել։ «Սիրելի ընկերներ, շնորհակալ եմ ձեզ՝ դրական լիցքերի ու բարի խոսքերի համար։ Դուք եք ինձ ուժ տալիս»,- ասել է չեմպիոնը։
Հպարտության ու երախտիքի խոսքերի է արժանի միայն այսպիսի կամքի ուժ ունեցող մարդը։ Նա 2014 թվականին ծանր վիրավորում է ստացել Արցախում՝ զինակցին ադրբեջանցիների դիվերսիոն հարձակումից փրկելու ընթացքում պայթել է ականի վրա՝ կորցնելով ոտքերն ու ձեռքը։ Բայց տոկուն ոգին նրան ոտքի կանգնեցրեց․ դեպքից ամիսներ անց նա «Արիության» մեդալն ստացել է ոտքի վրա՝ քայլելով հասնելով ՀՀ նախագահին։ Սարգիսը հիմա էլ ծառայում է ՀՀ զինված ուժեում։
Ստեփանյանը մանկուց զբաղվել է ծանրամարտով, ստացել է Սպորտի վարպետի կոչում։ Վիրավորումից հետո էլ որոշել է մարզավիճակ պահպանել, բայց ունակությունները գերազանց են եղել, և հիմա նա չեմպիոն է դառնում բազկամարտում։
