Անդրեաս Անդրեասյանը Արարատի մարզի Ուրցաձոր գյուղից է: Նա ծնվել է 2001 թվականին: Տասնիննամյա երիտասարդը ԵՊՀ տնտեսագիտական ֆակուլտետի սան էր:
Համալսարանական ուսումը կիսատ թողնելով՝ Անդրեասը զորակոչվում է բանակ՝ ծառայության անցնելով Ասկերանի զորամասերից մեկում:
Պատերազմի մեկնարկի հենց ամենասկզբից Անդրեասը ներգրավվել է մարտական գործողությունների մեջ և հերոսական պայքար մղել շուրջ երեսունմեկ օր: Հոկտեմբերի քսանութի թեժ մարտերի ժամանակ Անդրեասը ծանր վիրավորում է ստանում:
Մինչ վիրավորվելը նա ընկերներից մեկին է տալիս հորեղբոր որդու հեռախոսահամարը՝ պատվիրելով իրեն մի բան լինելու դեպքում նրան զանգեն, այլ ոչ թե իր ծնողներին՝ նախապես պատկերացնելով ծնողների հավանական ապրումները:
Անդրեասի կյանքի համար բժիշկները պայքարում են շուրջ յոթ օր, սակայն նրա կյանքը, ցավոք սրտի, փրկել չի հաջողվում:
Նա անմահանում է, սակայն նրա հերոսական պայքարի պատմությունն անմահացրել է նրա անունը Արցախի համար մղվող պայքարի պատմության հերոսական էջերում:
