Սամվել Հովակիմյանը գյումրեցի էր։ Նա քսաներեք տարեկան էր և մասնակցել էր ապրիլյան մարտերին։ Արցախյան վերջին պատերազմի մեկնարկին Սամվելը Գոռի հետ միասին կամավորագրվում է ու հասնում Հադրութ։
Թեժ մարտերից մեկի ժամանակ Գոռը վիրավորում է ստանում։ Իր փակ դաշտը թողնելով՝ Սամվելն առանց մտածելու վազում է բաց դաշտ՝ ընկերոջն օգնելու և փրկելու։ Նրան հաջողվում է փրկել Գոռի կյանքը, սակայն, ցավոք, ինքն է մահացու վիրավորում ստանում։
Պատերազմի ավարտից հետո Գոռը դառնում է Սամվելի ընտանիքի ամենամտերիմ ու սրտացավ հարազատը։ Այսօր Գոռի և Սամվելի քույրիկի՝ Արևի հարսանյաց արարողությունն է։ Նրանք սկզբում Սամվելի շիրիմին են այցելել։
Սոնա Վարդանյանը, տեղադրելով Արևի և Գոռի Եռաբլուր կատարած այցի լուսանկարներից մեկը, գրել է հետևյալը․ «Այսօր տեղի է ունենում անմահ հերոս Սամվելի հարազատ քույրիկի՝ Արևի, և իր մարտական ընկերոջ՝ Գոռի, հարսանիքը։
Սամը էն հերոսն է, ով պատերազմի ժամանակ Գոռի թիկունքը պաշտպանելով զոհվել է»,- իր գրառումը եզրափակել է Սոնա Վարդանյանը։
